Попередню частину можна переглянути за посиланням: Sebastiano Acerni Gorais. P. VII
JOANNES GORAISKI ALEXANDRI SECUNDI FILIUS.
XIII.
Natus Joanni generosa Georgius atque
Unica progenies, virtuti nata colendae,
Filius eximio quondam genitore, bonisque,
Optimus et frugi, dignus majoribus heros;
Isque Stanislaum genuit, genuitque Joannem,
Nascitur extremo sequiturque Georgius ortu,
Omnes egregii, clari virtutibus omnes,
Ingenua probitate pares belloque togaque
Acres consilio, dextra non deside prompti
Et patria et coelo dignissima sidera fulgent.
DECLARATIO.
Joannes Goraiski, Alexandri Secundi filius, et Petri, de quo mox dicetur, germanus, homo prisca nobilitate et propriis virtutum et meritorum accessionibus insignis et clarus, procreavit prope divinum heroem Georgium Goraiski, et patri et patriae non indecorem; qui tandem genuit filios non degeneres, neque Christino magno illo proavo indignos, abnepotes verum domestici archetypique laboris et splendoris imitatores, et autores novae propriaeque gloriae, nempe Stanislaum, Joannem et Georgium, quos Deus et sua dextra ad fastigium verae nobilitatis evexit.
Читайте також: Польськомовна поезія в контексті давньої української літератури: тематика та художня специфіка
PETRUS GORAISKI ALEXANDRI SECUNDI FILIUS, IN GORAI ET RADZENCZIN HAERES.
XIV.
Petrus in heroum numero clarissimus ardet,
Et patrum sydus coelo gratissimus ignis,
Tutelare domus numen columenque paternae
Et gentilitiae stirpis, velut aurea torques,
Producit non degeneres generosus alumnos,
Supplementa sui natos horumque minores,
Egregia, nostro quae nunc quoque splendet in aevo.
Nam duo laetificant praestantia pignora patrem,
Alter Joannes acer, Manostia proles,
Alter Adam fulget, vir strenuus atque probatae
Relligionis (sic) amans, pietate coruscat et armis,
Integer, innocuus, decoris suecessor aviti,
Prole parens foelix, de qua spes maxima surgit.
DECLARATIO.
Petrus Goraiski, Alexandri Secundi filius, avus vero istorum, qui nunc officium virtutis exercent, Goraisciorum, fuit vir apprime nobilis, omninoquo dignus, qui saeculis omnibus omnique posteritati innotescat. Hic ex justo matrimonio proseminavit egregium par filiorum, nempe Joannem et Adamum, non minus egregiae generosaeque posteritatis propagatores. Sed Joannem et illius filios in finem hujus opusculi consulto distulimus: nunc vero de Adamo et Abraamo illius filiis verba faciemus, praeposterum quendam ordinem secuti; quod ut bona venia primogenitorum fiat rogo.
ADAMUS GORAISKI PETRI FILIUS ET JOANNIS ROTMAGISTRI FRATER NATU MINOR.
XV.
Relligione domi radias; tamen illa severum
{Bono viro eadem cura debet esse relogionis ut defensionis patriae et ecclesiae. 2. Esdrae 4. Una manu faciebant opus, altera tenebant gladium}
Martis opus, dum res vocat, haud emasculat aequi,
Non secus, ut quondam reficit venerabue fanum
Nobilitas Judaeorum, populusque bidexter;
Altera namque manus gladium prendebat et arma,
Ut turbatores operis depelleret hostes,
Altera quo summi raperetur numinis aedes,
Intritam lateres et ferramenta premebat.
Sic animosus Adam, si Martia bella fremebant,
Impiger exutum vaginis arripit ensem;
Otia consumit precibus, votisque Tonantem
Sollicitat, mentemque sacro meditamine pascit.
Sic decet heroem, sic nobilitate decorum,
{In otio et pace pietatem exercendam esse. Civis utraque bonus}
Ut sit utranue bonus civis belloque togaque.
DECLARATIO.
Adamus Goraiscius Petri ejus nominis primi filius, Succamerarius (quem vocant) Lublinensis, in bello strenuus, in otio pius, in omni fortuna constans, veraeque nobilitatis vivum et ipsissimum exemplar. Qui genuit magnae spei filium Abraamum, prosapiae suae decus indubitatum.
Читайте також: Неандер Йоган. Табакологія
ABRAAM GORAISKI ADAMI FILIUS SUCCAMERARII LUBLINENSIS.
XVI.
Spes in flore tua est; ergo ne decidat iste
Veris honor, flabris animi decussus iniquis,
Tempore sic verno, sic utere floribus istis,
Ut tuus autumnus pleno ferat ubere fructum.
Tempestas animi quovis est turbine pejor.
Ergo virtutum doctis reprimatur habenis;
Nam si liberior magno ruet agmine ventus,
Floribus amissis, fructu privabitur arbor.
Sed quid opus verbis, cum tu praesentia patris
Inspicias exempla domi, semper tibi fortes
Auribus atque oculis patrui observantur avique,
Ingeniumque tibi ad virtutis munia pronum est.
DECLARATIO.
Abraamus Adamides Goraiski, quoniam juvenis eo est ingenio ut suapte natura feratur ad res praeclare gerendas, babeatque domi suae avita, paterna et patruelia exempla, quae sunt omnium sapientum praeceptis (quibus et ille abundat) efficaciora, ergo non temere multam de se spem apud omnes bonos excitavit. Nam bona natura, bonis iisdemque familiaribus exemplis intenta, virtutis certe perfectissimam imaginem absolvere, si non per omnia potest, certe prorsus cupit.
JOANNES GORAISCIUS, PETRI SENIOR FILIUS COHORTIBUS REGIIS PRAEFECTUS, EJUS NOMINIS SECUNDUS.
XVII.
Duri Martis opus tractas animose Joannes!
Magne Goraisciada, generosi sanguinis ingens
Progenitor, columenque decusque vetustae
Autor et exemplum virtutis imagoque viva
Bellatoris eras, quem nulla tonitrua Martis
Nullaque tempestas et nulla pericula terrent.
Nulla Sigismundo quondam sub Principe gesta
Praelia sunt quin pars etiam speetanda fuisset.
Fidus Joannes patriae se totus ubique
Devovet, impigras ducitque regitque cohortes.
Concilium heroum celebratur in Aulide quondam;
Ilion ad magnum Phrygiosque in Troas iturum;
In quo Demophoon erat et versutus Ulysses,
Imperio Atrides insignis et aemulus Ajax,
Et quondam sociis aegre placatus Achilles.
Sed si quis nostros heroas et arma videret
Radoscoviacis in agris procerumque coronam,
In Moscumque profecturos et praelia Mosco
Intentaturos altissima corda Polonos,
Omnes Aeacidas dixisset et Hectoras omnes.
Hoc in conventu procerum lectaque corona
Instruit egregias acies ducitque phalangas
Et numero multas, animis et corpore firmas,
Saepe Sigismundo specimen virtutis adultae
Praebuit Augusto, factisque probaverat ipsis
Goraioviacae gentis non futile pectus.
Conjugio tandem justo tria lumina, fortes
Progenuit natos et pignora digna parente.
Nascitur imprimis patri robusta propago
Viribus ingenuis firmus, validisque lacertis,
Dignus avis, dignus cognomine patre Joannes,
Dignus et a sera qui posteritate legatur.
Nascitur et Petrus, dextra vir Pallade natus,
Quin etiam dextro Cytherei numinis astro,
Seu tu mireris faciem, cui gratia formae
Atque venustatis magnos afflabat honores,
Seu mores et virtutum redimicula species
Ingenuasque artes, quas consummavit in illo
Usus et insignis rerum experientia nec non
Urbes conspectae, totum lustrata per orbem
Scita, virum leges, artes, opulentia, vires,
Quae caput ingenuum cognoscere singula prodest.